សៀមរាប៖ គ្រឹះស្ថានអង្គរបានឱ្យដឹងថាក្នុងរយៈពេល ៤ខែ ដើមឆ្នាំ២០២៤ នៃការលក់សំបុត្រជូនភ្ញៀវទេសចរបរទេសចូលទស្សនារមណីយដ្ឋានអង្គរ គ្រឹះស្ថានរបស់រដ្ឋមួយនេះរកចំណូលបានជាង ២០លានដុល្លារអាមេរិក។
យោងតាមសេចក្តីប្រកាសព័ត៌មានរបស់ គ្រឹះស្ថានអង្គរ នៅថ្ងៃទី១ ខែឧសភា ឆ្នាំ២០២៤ បានបញ្ជាក់ថា រយៈពេល ៤ខែ ឆ្នាំ២០២៤ រមណីយដ្ឋានអង្គរ ទទួលបានភ្ញៀវអន្តរជាតិសរុប ៤២១ ៣៧៩នាក់ ដែលរកប្រាក់ចំណូលបាន ១៩ ៩១៧ ៥៣៣ ដុល្លារអាមេរិក។
ដោយឡែក ក្នុងខែមេសា ឆ្នាំ២០២៣នេះ មានទេសចរបរទេសសរុប ៧៣ ៨៤៥នាក់ បានទិញសំបុត្រចូលទស្សនារមណីយដ្ឋានអង្គរ សរុប ៣ ៣៨៤ ២៤០ ដុល្លារអាមេរិក។
ជាមួយគ្នានេះ គ្រឹះស្ថានអង្គរក៏ទទួលបានចំណូលពីការលក់សំបុត្រទូក រយៈពេល ៤ខែ ក្នុងឆ្នាំ២០២៤ មានចំនួន ៣៦១ ៥៥៦ ដុល្លារផងដែរ៕